//
you're reading...
Palanta

Lurah Indak Babatu, Ijuak Indak Basaga

Sabana marasai urang-urang nan manjadi tanago karajo di lua nagari. Pai jo badan segeh badagok, pulang penyok-penyok. Malah, indak taetong pulo nan pulang hanyo maik.

Barita di surek kaba ‘Singgalang’ nan dibaco komunitas lapau Uwo Pulin, ado surang tanago karajo dari Banten, pulang lah jadi janazah. Kabanyo, pahlawan devisa tu dipungkangi dek induak samang atau majikannyo sampai mati.

Barita sarupo itu sabana mambuek urang-urang di lapau Uwo baibo hati. Baa ka indak? Tanago karajo tu pai ka nagari urang hanyo untuak mancari paisi paruik nan lapa sarato pungguang nan indak basaok. Tapi, di nagari subarang, nan didapek bukannyo pitih, tapi malah padiahnyo parasaian. Kadang-kadang urang-urang tu indak ubahnyo sarupo binatang dibuek dek induak samangnyo. Karanonyo, indaklah heran, kalau parasaian tanago karajo tu manjadi bahan ota di palanta lapau Uwo.

“Mangaku lai sarumpun sarato badunsanak jo awak, tapi parangainyo labiah jaek dari komunih. Murah-murah se dek nyo maaniayo dunsanak awak, malah ado nan sampai mati. Sabana indak ado nurani nampak dek ambo,” baitu Kudun mangaluakan pandapeknyo.

Kudun sabana raman-raman mamikiakan parangai urang-urang kayo nan lah manjadikan urang Indonesia untuak tanago karajonyo. Lah sarupo binatang atau budak balian dibueknyo tanago karajo dari Indonesia.

“Iyo! Kalau sakali atau duo kali, barangkali masih bisa awak pahami. Tapi nan kajadian majikan maaniayo urang Indonesia indak taetong lai sajak saisuak. Bamacam caronyo maaniayo dunsanak awak. Ado nan ditokok, disiram aie angek, ditarika badannyo, disaik-saik pakai pisau sampai indak diagiah makan bahari-hari. Padohal, tanago dunsanak awak tu diparahnyo sarupo mamarah kain cucian,” Malin Kacindin indak tingga basuaro.

“Itulah nasib urang bansaik. Kadang-kadang lah dianggap sampah atau malah labiah randah dari itu. Cuma ambo indak abih pikia, pamarentah nagari awak ko anok-anok se. Satiok rakyaiknyo nan pulang dari lua nagari mambao luko atau bahkan sampai maik bagai, alun nampak tando-tando reaksi dari pamarentah. Paliang-paliang hanyo mangecek ka mangecek sajo. Bantuak lurah indak babatu, ijuak indak basaga. Takuik bana pamarentah awak jo nagari lua tu,” kato Angah Piyan pulo.

“Awak ko urang panyaba, Ngah!” Sorak Tacin.
“Saba tu ado batehnyo, Cin. Kalau kapalo dikajambani tiok sabanta dek urang, awak masih saba, itu namonyo panakuik,” kecek Angah.

“Iko indak dikajambani se lai doh, Ngah. Lah dibunuah ciek-ciek warga awak mah,” kato Kudun.
“Kan lai ado kaputusan pamarentah kapatang ko, indak buliah mangirim pambantu lai ka nagari jiran tu,” giliran Tan Baro nan mangecek.

“Ambo raso itu alun cukuik. Musti ado langkah sarato tindakan lain. Umpamonyo manuntuik majikan jo pamarentah nagari tu nan indak malinduangi tanago karajo dari nagari awak,” kecek Kudun sakali lai.

“Kok dek ambo pendek se nyo. Ijan mancari itduik juo ka sinan, abih pakaro! Lah jaleh sarupo itu kajadiannyo, nan awak indak juo jaran. Pai juo marantau ka sinan,” kato Mak Pono.

“Lai ka bakarajo di siko, tapi indak ado lowongan. Kok ado bana lowongan, indak dapek pambali sabun denyo doh,” baleh Udin Kuriak nan dari tadi cuma manjadi pandanga. (Espe St.Soeleman)

Sumber : Singgalang

Discussion

One thought on “Lurah Indak Babatu, Ijuak Indak Basaga

  1. Hi there Dear, are you genuinely visiting this site on a
    regular basis, if so after that you will absolutely take pleasant experience.

    Posted by Bernardo | September 23, 2014, 12:04 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: