//
you're reading...
Palanta

Trans Kuranji

Angah Piyan nan baru sajo salasai mambaco koran ‘Singgalang’ bacarito ka kawan-kawannyo. Kecek Angah, di Padang ka ado pulo angkutan kota sarupo Trans Jakarta nan ado di Jakarta. Tantu sajo tacingangak nan lain mandanga. Maklum, pagi tu masih banyak nan alun mambaco koran. Dek itu pulo Angah basumangaik mangatokan, kota ko ka batambah gagah.

“Kok iyo, tantu awak lah bisa pulo mambanggakan diri ka urang-urang nan ado di kota lain. Aratinyo bana, kota awak ko lah manjadi metropolitan. Yo, ndak Wo?” Kato Angah mampaiyokan ka Uwo Pulin. “Indak picayo den doh. Angkutan sarupo kini se indak taurus, apolai ditambah jo angkutan sarupo di Batawi tu,” jawek Uwo.

“Iko indak main-main doh Wo. Ambo lah baco tadi di koran, untuak mambuek angkutan massal sarupo di Jakarta tu lah dibuek kasapakatan jo Departemen Parhubuangan. Lah ado itam di ateh putiah,” kato Angah. “Bia itam di ateh putiah, bia itam di ateh sirah atau di ateh ijau gai, nan sarupo di Jakarta tu alun ka bisa dibuek di siko lai. Dan, ciek lai salamo ko awak di siko kan banyak rancana. Hanyo itu. Sarupo urang sadang sakik damam, raso kalamak se sadonyo, tapi indak ciek juo nan lalu. Baa manuruik Tan Baro?” Uwo indak namuah kalah, sudah tu mampaiyokan ka Tan Baro.

“Manuruik ambo, kalau diinok-manuangkan, memang kota awak ko lah patuik pulo sarupo Jakarta. Kalau di Jakarta ado Trans Jakarta, mako di siko tantu namonyo Trans Padang, atau Trans Kuranji. Cuma, di baliak itu tantu awak ukua pulo bayang-bayang,” jawek Tan Baro.

“Mukasuiknyo?” “Cubo awak caliak, apo jalan di siko lai mandukuang untuak angkutan sarupo itu? Kalau wak bandiangkan jo Jakarta, jalan utamo di awak, samo jo jalan kalurahan di Jakarta. Jo angkutan kota ketek-ketek se, lah sampik balai dibueknyo. Macet ado di mano-mano. Caliaklah di pasa raya atau di dakek tugu aie mancua, basalingkik-pingkik indak bisa manggarik. Nah, kalau ditambah pulo jo bus-bus gadang tu, tantu batambah rumik jadinyo. Antah kok angkutan massal tu dibuek-an jalan layang atau jalannyo di awang-awang,” jawek Tan Baro.

“Pamarentah awak tantu lah punyo patimbangan-patimbangan, Tan. Umpamonyo, angkutan kota ketek-ketek tu hanyo malayani trayek komplek-komplek parumahan ka jalan utamo se lai, atau diapuih saparo dan diagiah kasampatan ka induak samangnyo mangganti jo angkutan massal tu. Pasti ado langkah-langkahnyo dek pamarentah,” baleh Angah.

“Yo, kalau harapan awak tantu iyo sarupo itu. Tapi, mancaliak contoh ka nan sudah, jo pangalaman salamo ko, satiok ado kabijakan baru pasti ado reaksi, ado nan indak satuju. Apolai kalau sampai angkutan kota nan ado kini diapuih atau diusia ka daerah pinggiran, pasti mambuek sansai induak samangnyo. Kini sajo, rato-rato supir angkot mangaluah karano indak dapek sewa dan indak cukuik setoran, apolai kalau dipindahkan. Cubolah wak tanyo ka dukun angkot ko ha!” Kato Tan Baro manunjuak Kari Garejoh.

“Ambo satuju. Memang di kota ko lah patuik ado angkutan massal. Tapi, apo iyo lai mungkin? Cuma sajo, ijan patuik se nan jadi paratian awak. Apo lah mamungkinkan? Bak kato Tan Baro tadi, apo jalan di siko lai mandukuang?” Hanyo itu jawek Kari.

“Batua!” Tibo-tibo Tacin basuaro. “Apo nan batua?” Tanyo Kari. “Iyo batua! Di siko iyo lah patuik lo ado bus-bus saroman di Jawa tu. Tapi, jan sampai mamatikan angkutan nan lah ado. Jan sampai angkot-angkot tu samo nasibnyo jo bemo,” jawek Tacin mangaluakan pandapeknyo langkok pakai contoh. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: