//
you're reading...
Palanta

Cap Ampu Geleang

Tan Baro malangkah masuak ka lapau Uwo Pulin. Sabalah tangannyo masuak ka saku-saku sarawa dan sabalah lai diangkek tinggi sarupo urang malambai.

“Ha….., iko nyo ha, Tan Baro lah tibo!” Baitu tadanga suaro dari dalam lapau. Nan mangecek tu Udin Kuriak. “Kamanga ambo?” Baitu tanyo Tan Baro sambia mancari tampek duduak.

Kabatulan di sabalah Uncu Labai ado tampek kosong, mako mahanyaklah Tan Baro di situ. Indak lamo sasudah itu datang Uwo Pulin mambao sagaleh kopi angek. Galeh angek tu dipacik lambek-lambek, dan kopi dibagi ka piriang tadah. Indak sampai duo atau tigo minik, diminum saraguak. Sudah tu, dibaka pulo rokok sabatang dan tampaklah asoknyo mangguluang ka udaro.

Baitulah kabiasaan urang-urang di lapau Uwo satiok hari. Kopi nan baru ditatiang dek urang punyo lapau hanyo diraguak saraguak, duo raguak sajo. Istilahnyo untuak palamak-an rokok. Sudah tu, kopi nan mulai dingin dipindahkan baliak ka dalam galeh. Beko, kalau lah abih saparo, dimintak tambah aie ka urang lapau. Malah, ado pulo nan sampai limo kali mintak tambah aie, sahinggo lah karuah karak bantuak kopi nan tadinyo itam pakek.

“Balaku juo pandapek Tan Baro dulu nampaknyo,” kato Udin. “Pandapek nan ma tu?” Tanyo Tan Baro. “Kan pernah awak maota masalah anak jalanan. Katiko itu, Tan Baro mangatokan, anak-anak jalanan jo tukang mintak sidakah tu indak bisa hanyo dirazia atau diburu sarupo ciliang masuak kampuang. Karano, sasudah dirazia, katiko patugeh talengah, anak-anak tu babaliak ka tampek inyo mancari makan.

Nah, kalau indak salah wakatu itu Tan Baro maagiah pandapek supayo anak jalanan tu dibina atau diagiah katarampilan,” kato Udin manjalehan. “Iyo, baa tu?” jawek Tan Baro. “Pamarentah kota awak ko lah barancana malatiah anak-anak jalanan tu untuak manjadi montir henpon. Bacolah ko ha, barita hari kini,” kecek Udin baliak sambia maagiahan koran ‘Singgalang’ ka konco palangkinnyo tu.

“Kalau iyo, iko cap ampu geleang untuak pamarentah kota awak. Iyo iko nan paralu. Ijan hanyo wacana jo rancana sajo, tapi buktinyo indak ado. Sajak dulu, baraalah banyaknyo rancana, nan ikolah, nan itulah, kadang-kadang lah sarupo urang damam. Raso ka lamak se sadonyo, baa manuruik kawan-kawan tu?” Bakomentar juo Tan Baro jadinyo.

“Kalau memang iyo lai ado palatiahan untuak anak-anak jalanan tu, iko paralu awak puji. Bak kecek Tan Baro tadi, wak agiah cap ampu geleang. Indak cukuik duo ampu, agiah ampek ampu. Baa dek Kari?” Kato Angah Piyan. “Lai indak sakadar palatiahan se? Nyo banyak lo nan hanyo palatiahan, tapi indak diagiah modal. Sudah tu, anak-anak tu latiah surang se dan ujuang-ujuangnyo babaliak ka profesi samulo,” jawek Kari.

“Dalam barita ko keceknyo lai diagiah tampek karajo untuak mambukak bengke hape. Kalau sarupo itu, tantu aratinyo diagiah modal,” baleh Udin. “Kok lai bantuak itu, ciek lai cap ampu geleang dari ambo, Din! kato Angah. “Lah limo mah,

Ngah! Kama dicarian ciek lai ampunyo tu?” Potong Kari sambia galak. “Salang ampu Kari ciek lu,” Angah indak kailangan aka manjaweknyo, dan itu juo diiriangi jo galak dek kawan-kawan lain. “Calon presiden ambo cap ampu geleang lo nyo!” Mak Pono manyalo.

Cuma sajo, apo nan dikatokan gaek tu indak ditanggapi dek nan lain. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: