//
you're reading...
Palanta

Musang Babulu Ayam

Kecek anak mudo kini, jan picayo bana jo kesing. Rancak di lua, alun tantu rancak di dalam. Bisa sajo di lua mode baru, tapi di dalam buatan saisuak.

Bak umpamo oto di jalan raya, tampilannyo sabana rancak, indak ubahnyo oto paliang baru. Tapi, kalau dicigok bana elok-elok, bisa sajo itu oto buatan taun 1980-an, atau mungkin juo Chevrolet 57. Karano, kini ko apo nan indak bisa dipabuek urang. Jo kamajuan ilimu sarato teknologi, nan lamo bisa baru, nan usang bisa rancak. Ijankan barang-barang pakaian awak, wajah manusia sajo bisa dibuek baru. Manusia nan lahia taun 1950-an bisa nampak sarupo anak gadih 17 taun, bak ayam potong ampek di lapau nasi.

Saindaknyo, apo nan dipikiakan Tan Baro tu, manjadi ota di palanta lapau Uwo Pulin. Ota tu bamulo dari duo barita nan ditulih di surek kaba ‘Singgalang. Nan ciek bajudul: ‘Tiga Polisi Gadungan Diringkus’. Barita nan ciek lai judulnyo: ‘Pencuri Berkedok Peminta Sumbangan Diciduk Polisi’. Kaduo barita tu intinyo adolah caro-caro baru urang jaek untuak malakukan aksinyo.

“Memang iyo, awak indak buliah capek picayo ka urang-urang nan datang ka rumah atau ka tampek awak karajo. Karano, kini baitu banyak caro urang jaek untuak manjalankan aksinyo. Ado nan icak-icak manjadi tukang cari sumbangan, ado nan manyamar bantuak sales dan malah ado pulo nan sarupo polisi, sarupo pangusaha. Turun dari oto rancak, mamakai dasi, kadang pakai jas bagai. Tapi, katiko awak talengah, inyo mulai malakukan aksi. Kok henponlah nan ka disembanyo, kok motorlah, kok televisi bagai. Mungkin kalau awak indak hati-hati, bisa-bisa pariuak, kompor, batu lado, sanduak pangadang dibaonyo juo,” kato Angah Piyan.

Mulonyo iyo agak tacingangak urang-urang tu mandanga kecek Angah. Tapi sampai di kalimat-kalimat pangabisan, tabasuik juo galak dibueknyo. Karano, urang maliang mamakai dasi sarato jas, tapi nan dibaonyo cuma pariuak jo batu lado.

“Ha…..ha….., baa pulolah bantuaknyo urang pakai jas, pakai dasi, tapi maliang pariuak jo batu lado,” kato Udin Kuriak.

“Nan sarupo itu bisa tajadi, kalau awak lengah. Kan ado pulo urang maliang tu nan punyo prinsip: ‘rancak ciek daripado nol’. Aratinyo bana, rancak mambao batu lado jo pariuak, daripado indak dapek samo sakali. Karano, awak lah talonsong manjadi maliang, dan urang lain lah pasti mangatokan awak pai maliang,” baleh Angah. “Memang iyo! Di maso kini kito musti waspada. Karano, kini banyak musang babulu ayam. Panampilan keren, tapi cuma maliang. Balagak sarupo polisi, tapi urang maliang gadang,” lah sato pulo Tan Baro mangecek.

“Ado pulo kajadian dulu. Lagaknyo sabana alim. Masuak ka musajik untuak baibadah, tapi kalua dari musajik mambao kotak infak,” Kari Garejoh mangaluakan pandapek pulo.

“Makonyo, wak jadikanlah kajadian-kajadian sarupo itu untuak pangalaman. Awak ijan lakeh picayo jo lagak atau panampilan urang-urang nan datang ka tampek awak. Karano, lagak nan keren, alun tantu sairama jo parangainyo. Bak kecek tadi, banyak nan sarupo ayam, tapi tanyato musang gadang,” kato Tan Baro maulang istilahnyo tadi jo versi lain.

“Di siko ado lo nan sarupo itu mah. Kok lagak bantuak urang ka mati, tapi aka indak ilang,” kato Tacin sambia mancaliak jo suduik mato ka Ajo Tondeh.

“Mangecek, mangecek je lah Cin, ijan mancaliak buruak ka urang,” baleh Ajo nan disambuik jo galak dek kawan-kawannyo. Baitulah di lapau Uwo tiok hari. (Espe St.Soeleman)

Sumber : Singgalang

Discussion

One thought on “Musang Babulu Ayam

  1. yo sabana lucu caritonyo, galak2 surang se awak mambaconyo hahaaa…

    Posted by Masdilla | August 18, 2010, 10:50 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: