//
you're reading...
Palanta

Ratok Tangih

Surek kaba ‘Singgalang’ sabana remoh karano diparabuik-an dek komunitas lapau Uwo Pulin. Satiok urang di situ nio capek mambaco barita angek hari tu. Malah, kadang-kadang lah sarupo barabuik pitih be-el-te bagai.

“Capeklah Din! Kok baraja mambaco indak kini masonyo doh. Sajak dulu lah disuruah sikola, tapi main kalereang. Kini, rasoanlah, indak pandai mambaco lanca,”
Baitu sorak Kari Garejoh mamintak surek kaba ka Udin Kuriak. Nampaknyo Kari sabana indak saba, nio tau sacapeknyo barita hari tu.

Malin Kacindin nan baru tibo di lapau tu indak tau bana, apo nan diparabuik-an kawan-kawannyo. Mako ditanyolah ka Uwo Pulin nan sadang manatiang kopi.
“Ado tambang batubaro runtuah di Sawahlunto. Banyak urang anguih dibueknyo,” baitu jawek Uwo.
“Eh, kok baitu iyo paralu dibaco mah. Salang sabanta Din!” kato Malin mauluakan tangannyo.

“He….he…., Malin. Iko urang-urang nan ado di sakuliliang lah dari pagi mamintak mah. Ado lo nan manyogok ambo pakai rokok sabatang gai, tapi alun ambo agiahan. Masalahnyo, ambo alun salasai mambaco lai. Beko, kalau ambo lah salasai, lameh banalah dek Malin. Kalau paralu bao gai ka rumah mambaconyo,” hanyo itu nan bisa dikatokan Udin.
Baitulah situasi di lapau Uwo. Barabuik koran katiko ado barita atau kajadian memang lah biaso. Walau barabuik mulonyo, namun kasudahannyo saluruh urang bisa juo mambaco barita-barita nan dimuek surek kaba paliang bapangaruah di nagari ko, yaitu koran ‘Singgalang’. Koran tu lah bataun-taun dilanggani dek komunitas lapau Uwo. Pitih pambayia langganan diambiak dari labo galeh Uwo.

“Di Sawahlunto, banyak urang maningga dek ulah tambang batubaro nan maledak. Di siko ado anak es-em-pe dibunuah, sudah tu dimasuak-an ka dalam karuang dan dicampak-an baitu sajo. Kaduo barita ko sabana mambuek aie mato ambo maleleh,” kato Udin Kuriak.

“Samo wak mah. Ambo juo baitu. Tadi sampai maramang bulu tangan ambo mambaconyo. Indak tabayangkan baa urang-urang nan bakureh di lubang batubaro tu harus maragang nyawa dek ulah gas baracun,” kato Angah Piyan.
“Kok dek ambo indak hanyo kajadian di tambang batubaro tu se nan mambuek ibo. Kajadian anak sikola em-em-pe nan dibunuah dan mungkin juo diperkosa tu, indak tabayangkan dek ambo doh. Bantuak mambunuah binatang se deknyo. Maso iyo manusia dibunuah, sudah tu dimasuak-an ka karuang. Antah dima lah parasaan tukang bunuah tu. Sabana biadab!” kato Uncu Labai pulo.

“Barangkali ikolah makna cuaca babarapo hari ko. Kalau awak paratikan memang cuaca kurang rancak. Dari pagi sampai jam sabaleh bantuak ka hujan labek. Tapi dari jam sabaleh sampai patang angek sabana angek. Wakatu anak es-em-pe tu dibunuah, hujan labek dari pagi sampai tangah hari. Jadi manuruik ambo indak hanyo manusia nan maratok, alam juo sato manangih,” Mak Pono lah sato pulo mangecek.

“Tapi, kajadian di tambang batubaro tu indak dek hujan gai doh, Mak!” Potong Udin.
“Ambo indak mangatokan dek ulah hujan doh. Ambo cuma bapandapek, lah ado tando-tando ka tajadi musibah di nagari ko. Baa dek Tan Baro?” jawek Mak Pono mintak pandapek ka Tan Baro.

“Sabananyo sagalo sasuatu tu bisa se dihubuang-hubuangkan. Kini nan jaleh, kajadian-kajadian sarupo itu indak surang juo nan mamintak. Karanonyo, kok dapek ijan ado juo lai musibah. Ciek lai, urang-urang jaek nan salamo ko manjadi pambunuah, kok dapek ditunjuak-an juo inyo ka jalan nan bana dek Tuhan. Kan iyo baitu, Ncu?” Kato Tan Baro sambia mamintak pandapek pulo ka Uncu Labai.

Uncu hanyo nampak maangguak sambia galak manih. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: