//
you're reading...
Palanta

Tarbudu, Tarbudin

Barangkali dek maso-maso kampanye manjalang pamiliahan presiden, mako ota di lapau Uwo Pulin lah acok pulo baisi masalah politik. Sarupo biaso, namonyo demokrasi, lah pasti pandapek urang di lapau tu babeda-beda. Apolai, dalam pamiliahan presiden bisuak ko cuma ado tigo pasang calon, tantu suaro tapacah tigo pulo. Itulah demokrasi!

Demokrasi di lapau Uwo Pulin indak pernah mamasokan pandapek antaro surang ka nan lain. Urang-urang tu samo maharagoi pandapek kawan ataupun lawan.

Kondisi di lapau Uwo memang agak babeda jo demokrasi di lua lapau. Dalam politik pamiliahan presiden di nagari ko nampak ado jatuah-manjatuahan. Kadang-kadang sarupo mamanjek batang pinang bagai. Bahkan, ado pulo nan manjua galeh kawan jo caro-caro nan kurang rancak.

“Sacaro pribadi, ambo sanang mancaliak pajalanan demokrasi di negara awak ko. Cuma, ambo kurang lamak mancaliak urang-urang di sakuliliang calon nan saolah-olah maambuih lampu kawan untuak manyalokan lampu surang,” kato Tan Baro.

“Mukasuik Tan Baro apo? Awak samo-samo punyo calon, Tan!” Solang Kudun.

“Justru itu. Ambo nio mancaliak apak-apak nan hebat tu mampatontonkan caro bademokrasi nan elok ka awak-awak ko, untuak ditiro ditauladani. Tapi nyatonyo, indak sarupo nan diarok. Umpamonyo ado tokoh awak nan mangatokan indak maakui Pak Gamawan sabagai gubernur di nagari ko. Apo lai tapek kato-kato tu? Karano satau ambo nan mamiliah Pak Gamawan tu bukan apak nan surang tu. Ado labiah duo juta urang di nagari ko mamiliahnyo dulu.

Kacuali, kalau apak tu nan maangkek gubernur dulunyo, ambo raso lai di tampeknyo kato-kato sarupo itu. Jadi, kadang-kadang awak mangecek sumbarang sajo, indak mampatimbangkan urang banyak,” kato Tan Baro.

“Tapi, apak tu kan mangecek ateh namo pribadi. Ambo raso sah-sah sajo,” Kudun mancubo mamanciang.

“Memang indak ado salah, untuak mangaluakan pandapek doh. Karano, kamerdekaan bapandapek tu dijamin dek undang-undang. Masalahnyo, pandapek surang ijan dipasorak-an di tangah rami. Sarupo di lapau ko lah. Contohnyo, Mak Pono salamo ko kan juo banyak indak sapandapek jo bupatinyo. Itu cuma untuak inyo sajo. Inyo indak pernah basorak di muko urang rami,” baleh Tan Baro.

“Batoh, Tan! Bilo ambo indak malawan ka bupati ambo? Apo untuang ruginyo jo ambo? Kan ambo lah marantau. Ambo indak pernah sato mamiliah bupati tu doh. Kalaupun ambo pernah kurang katuju jo caro-caro bupati tu, ambo lansuang katokan ka inyo. Indak bisa didatangi, ambo talepon. Indak bisa ditalepon, ambo es-em-es,” potong Mak Pono.

“Tadi kan contohnyo,” sambuang Tan Baro.

“Ambek cah lu, Tan. Ado pantun untuak itu ciek mah,” manyalo pulo Uncu Labai.
“Apo pantunnyo Ncu?” Kato Angah nio tau.

“Tarbudu, tarbudin. Kapalo samo babulu, pandapek balain-lain. Iduang samo babulu, piliahan politik juo balain-lain,” jawek Uncu sambia galak ketek.

“Yo, itulah demokrasi. Babeda-beda pandapek, tapi ijan mambuek sakik hati dan ijan sampai kawan dipuruak-an ka lubang sampik. Sakironyo nan di inyo manang bisuak, kamanga awak? Ciek lai, apo karano dek awak surang sajo, surang gubernur bisa baranti? Jadi, sarancaknyo biaso-biaso se lah,” kato Tan Baro baliak. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: