//
you're reading...
Palanta

Tampek Bapijak Taban

Tan Baro duduak tamanuang di suduik lapau. Tiok sabanta nampak maelo angok dalam-dalam. Saolah-olah inyo sadang bapikia kareh. Kadang-kadang sarupo barek bana baban nan sadang dipikiakannyo.
Indak taetong baraa batang rokok nan lah diiruiknyo dari pagi. Alun abih satangah batang, dibuangnyo ka bawah palanta. Indak lamo sudah tu dibaka sabatang lai.

Dalam pikiran kawan-kawannyo, pastilah ado nan sadang manjadi baban di pikiran Tan Baro. Karano, jarang bana inyo bakurenah sarupo itu.

“Baa, Tan? Buruak bana manuang nampak dek ambo dari tadi. Apo ado kusuik nan indak salasai atau karuah nan indak tajaniahkan? Kalau buliah, tolong kami diagiah tau. Mudah-mudahan jo basamo-samo awak bisa mancarikan jalan kaluanyo. Saindak-indaknyo, masalah gadang kalau awak bagi-bagi, pasti agak taraso ringan sasudah itu. Ijan dipandam surang, bisa batambah rumik beko,” baitu Mak Pono mancubo batanyo ka konco palangkinnyo tu.

“Kan itulah dek Mamak. Arok awak sajak dulu, bisa bagantuang ka niniak mamak, tapi apo nan tajadi? Tampek bagantuang tu bana nan putuih, tampek bapijak nan lah taban. Ado pulo niniak mamak nan kanai,” jawek Tan Baro sambia maelo angok sakali lai.

“Mukasuik Tan Baro? Kanai baa?” Tanyo Mak Pono nio labiah tau masalah nan dikatokan Tan Baro.
“Kan lah mambaco surek kaba ‘Singgalang’ Mamak? Di situ ado barita gadang nan mangatokan surang pajabaik ditahan karano disangko korupsi,” kato Tan Baro.

“Lai. Ambo memang lah mambaco judulnyo sajo, ado pajabaik nan ditahan. Tapi, apo pulo hubuangannyo jo Tan Baro? Baa kok tamanuang bana nampaknyo? Apo pulo hubuangannyo jo niniak mamak?” Samakin basumangaik Mak Pono batanyo.

“Nah, kalau alun mambaco memang indak tau masalahnyo doh. Nan kanai tahan tu memang pajabaik pamarentah. Tapi, di kampuang, apak tu surang niniak mamak. Aratinyo apo? Mustinyo surang niniak mamak di nagari ko kan tau di rantiang nan ka mancucuak, dahan nan ka manimpo. Karano nan manjadi pajabaik adolah niniak mamak, harusnyo tau nan elok jo nan indak elok. Tapi, apo nan tajadi? Kini nasi lah jadi bubua. Walau alun ado kaputusan pangadilan, tapi saluruh anak-kamanakan lah tau, niniak mamak ditahan jaksa. Iko adolah citra kurang elok di tangah masyarakaik nagari,” kasudahannyo Tan Baro bacarito panjang juo, langkok jo pituah adaiknyo.

Mak Pono nampak tamanuang mandanganyo. Baitu juo kawan-kawan lain, lah samo-samo malongo sajo.
“Bak kecek-kecek awak salamo ko, indak saluruh isi sawah tu boneh doh, Tan. Nan ditahan dek jaksa tu awak anggap se nan indak boneh. Atau kalau awak indak bisa manarimonyo, wak anggap pulo jaksa salah tangkok dan salah tahan.

Salah atau indaknyo, tantu isuak dibuktikan di pangadilan,” salo Angah Piyan.
“Iyo. Awak musti punyo prinsip praduga indak basalah. Tapi, di tangah-tangah nagari lah bakambang carito, niniak mamak atau tokoh masyarakaik ditahan dek jaksa. Apo indak manjadi citra buruak dek Angah tu?” semba Tan Baro.

Tamanuang baliak urang-urang di dalam lapau tu. Mustinyo memang surang niniak mamak atau tokoh masyarakaik tau jo jalan luruih sarato jalan basimpang. Tau jo elok sarato buruak. Bak kecek Tan Baro tadi, tau di dahan nan ka manimpo, tau di rantiang nan ka mancucuak.
“Sudah iko sia kiro-kiro lai, Tan?” Tanyo Kari Garejoh.
“Bisa lo Mak Pono, atau mungkin juo Uncu Labai gai,” jawek Tan Baro sambia galak manih. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: