//
you're reading...
Palanta

Sulik, Kecek Den!

Masalah pitih masuak sikola dijadikan ota dek komunitas lapau Uwo Pulin. Antah lah baraa kali masalah itu manjadi ota, indak taetong lai.

Barangkali wajar-wajar sajo itu manjadi bahan ota. Karano memang kini ko banyak urang nan sadang pesong mamikiakan nasib anak-anaknyo nan baru tamaik es-de ka masuak es-em-pe atau nan tamaik es-em-pe ka masuak es-em-a. Baitu juo nan tamaik es-em-a nio masuak kuliah.

Nan dipikiakan indak hanyo tampek sikola, tapi masalah pitih-pitihnyo. Maklum, mamulai tahun ajaran baru tantu indak saketek pitihnyo. Sagalonyo dibali. Mulai dari kaparaluan di kapalo sampai nan ka dipakai di kaki. Alun lai buku-bukunyo, mulai dari buku indak bagarih, sampai ka buku petak. Mulai dari buku nan tipih sampai buku paliang taba, sarupo kamus. Pokoknyo banyak.

Soal itu, agaknyo lah manjadi kawajiban dek mande-bapak anak-anak. Indak mungkin pulo anak basikola indak mamakai pakaian. Atau, anak-anak lain bapakaian saragam, nan anak awak bapakaian ka ladang. Anak urang pakai sipatu, anak awak pakai tangkelek. Anak urang punyo buku, anak awak indak, sarato lain-lainnyo.

Masalah nan paliang pesong dek urang rami kini ko adolah pitih-pitih salamo sikola. Karano, pamarentah lah basorak-sorak jo sikola gratis atau sikola perai sajak dulu, namun nan mambayia tatap juo. Bahkan, Kari Garejoh pernah manyamokan apo nan dikatokan pamarentah tu jo naiak oto ka Batusangka. Naiaknyo memang perai, tapi tibo di Lubuak Aluang, ongkoih dimintak dek sitokar.

“Sasuai jo pandapek awak salamo ko, sikola gratis tu indak bisa di nagari awak. Ko mah buktinyo, kapalo es-em-a lah mangaku sulik manjalankannyo,” kato Kari.
“Kalaulah kapalo sikola nan mangatoan itu, tandonyo awak musti mambayia,” baleh Angah Piyan.

“Tantu iyo. Dima pulo dalilnyo di nagari zaman kini ado nan perai dek Kari? Kan Kari juo nan pernah mangatoan, masuak kakuih se mambayia, apolai basikola. Di rumah sikola tu, anak-anak ka mandapek ilimu. Supayo ilimu dapek, anak-anak paralu buku, paralu praktek labor gai, paralu studi tur, malah kapatang ko kan ado pulo sikola nan mawajibkan anaknyo untuak pai hiking jo papisahan dan itu dibayia kasadonyo. Nan rumiknyo, kadang-kadang ado pulo kaputusan kapalo sikola atau kaputusan guru kelasnyo, pai atau indak pai, harus mambayia,” kecek Tan Baro.

“Itu pasti. Awak ko musti mambayia. Walau bungkuihnyo perai, namun isinyo tatap dibayia. Kan indak mungkin awak mambali bungkuihnyo se. Umpamonyo mambali bungkuih rokok. Sia nan ka namuah mambali bungkuih rokok? Lah basuluah matoari, bagalanggang mato rang banyak, nan awak ko paralu mambayia uang komite namonyo, sudah tu uang Pramuka, uang praktek, uang iko, uang itu. Kalau paralu pakai uang bangku dan uang meja gai. Pokoknyo banyak,” kato Uncu Labai.

“Apo juo lai? Sikola perai tu sulik, kecek den!” Tibo-tibo Mak Pono basuaro.
“Nan mughah tu, peghai sikola, Mak!” Manyolang pulo Ajo Tondeh.

Kasudahannyo batambah rami tadanga suaro urang di lapau Uwo. Malah, indak hanyo masalah sikola gratis, masalah paguruan tinggi swasta nan rajin manjua kecap juo diulang-ulang mampaotakannyo dek Tan Baro jo kawan-kawannyo. Karano, di nagari awak kini lah samakin banyak se paguruan tinggi. Indak hanyo di kota, tapi lah marambah ka saluruh kabupaten sampai ka palosoknyo gai. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: