//
you're reading...
Palanta

Pikia Nta Lu!

Udin Kuriak, Malin Kacindin, Pak Osu sarato Tacin baru sajo pulang dari kampanye. Lah sirah muko kaampeknyo dek paneh. Sasudah malatak-an motornyo di muko lapau, kaampeknyo lansuang se maanyak di palanta.
Walau patang-patang hari, namun lapau Uwo masih rami. Maklum, hari Akaik atau hari liburlah ka namonyo, urang-urang labiah suko duduak di lapau daripado bakuruang dalam rumah. Di lapau tu lah ado pulo Tan Baro, Angah Piyan, Mak Pono, Uncu Labai, Kari Garejoh, Ajo Tondeh, Kudun sarato lainnyo.

“Baa, Din. Lai rami kampanye tadi?” Tanyo Angah Piyan.
“Ondeh, sabana rami. Salain di tanah lapang, di pasa juo rami,” jawek Udin.
“Di pasa, indak bana ado kampanye, rami taruih Din. Nan langang tu di rimbo,” semba Kari nan maraso jawek Udin agak jangga di talingonyo.

“Hari ko abih kontrak Udin mah,” manyalo Mak Pono.
“Kontrak apo tu, Mak?” Tanyo Kudun.
“Maso iyo indak tau? Lah tigo pakan Udin dapek usao baru,” jawek Mak Pono.
“Usao apo? Baa kok indak maagiah tau? Bagi-bagilah ujuang proyek tu!” sambuang Kudun.

“Ha….ha…., katinggalan informasi bana Kudun nampaknyo mah. Lah tigo pakan Udin dapek proyek, tukang bao urang kampanye. Kalau tadi pakai baju kuniang, sabalun-sabalunnyo ado pulo warna lain. Pokoknyo lai ado juo urang kampanye, masuak galeh Udin,” Mak Pono manjalehan.

“Itu namoe biro pangerahan massa!” Salo Ajo Tondeh.
“Itu nan bisa di awaknyo. Kok ka manjadi Caleg pulo, awak indak bapitih. Karano itu dimanfaatkan sajo kasempatan kampanye untuak mancari balanjo. Walau sato kampanye di banyak partai, soal pilihan ado di dalam dado,” Udin manjawek.

“Tapi, mulai bisuak indak buliah kampanye lai. Agiahanlah wakatu ka kami-kami nan indak punyo partai ko untuak bapikia. Mudah-mudahan kami basuo partai jo Caleg nan lai sasuai jo jalan pikiran kami untuak kamajuan nagari ko. Karano, ambo caliak salamo kampanye, satiok partai tu hebat, saluruh Caleg tu santiang-santiang, sahinggo sulik mamiliahnyo,” mangecek pulo Angah Piyan.
“Indak picayo den doh!” Sorak Kari Garejoh.
“Indak picayo aponyo?” Tanyo Angah.

“Indak picayo kalau Angah indak punyo calon. Kan kamanakan Angah juo manjadi Caleg?” Jawek Kari.
“Eh….., walau kamanakan manjadi Caleg, alun tantu ambo ka mamiliah inyo lai. Karano, untuak urusan bangsa jo negara indak ado ikatan tali dunsanak doh. Kalau inyo indak bisa wak picayo, untuak apo dipiliah? Karano itu, awak ko paralu maso-maso tanang untuak bapikia atau maevaluasi sakalian kurenah partai jo Caleg salamo kampanye. Kan baitu, Tan?” Kato Angah mampaiyokan ka Tan Baro.

“Ehem….., bapikia ambo nta lu!” Hanyo itu suaro Tan Baro nan kalua.
“Apo juo nan ka dipikia lai?” Tanyo Kari.

“Ambo pikia-pikia dan ambo timbang-timbang gadang ketek paragiahan Caleg tu dulu,” jawek Tan Baro.
“Kalau bantuak iko patimbangannyo, alamaik ka karam nagari ko mah,” baleh Angah nan tadinyo arok dapek tambahan ilimu dari konconyo tu.

Baitulah ota di lapau Uwo Pulin. Bia patang hari, namun indak mangurangi ka masalah-masalah nan dijadikan topik. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: