//
you're reading...
Palanta

Nio Rancak, Jadi Bacak

Kota tampek tingga urang-urang di lapau Uwo Pulin ko lah nyato-nyato mandapek Piala Adipura. Cuma sajo, masih ado anggota dewan nan mangatokan alun barasiah atau masih kumuah.

Duo kanyataan tu sabananyo bisa ditarimo aka. Kota ko memang lah mandapek Adipura dan itu bukti, kota ko manjadi kota paliang barasiah dibandiangkan jo kota-kota nan sabana kumuah. Di baliak itu, memang indak pulo bisa diingkari, kalau di dalam kota ko masih ado tampek-tampek nan kumuah. Itu wajar! Ibarat padi di sawah, tantulah indak saluruhnyo boneh. Atau saumpamo baladang tomat, indak sadonyo rancak.

Baitulah kiro-kiro inti ota di lapau Uwo Pulin. Ota bamulo dari barita nan bajudul ‘Padang Masih Saja Kotor’.
Namonyo urang banyak di lapau, lah pasti ado beda pandapek. Ado nan lai sapandapek jo judul barita tu, tapi labiah banyak pulo nan mangatokan, kalau apak dewan tu hanyolah asa mangecek sajo. Karano, kalau memang kota ko kumuah, tantu indak mandapek Piala Adipura. Walau baitu, ado pulo nan tagak di jalan tangah, sarupo Tan Baro jo Udin Kuriak.

“Manuruik ambo, kota awak ko labiah barasiah dari kota-kota lain nan kumuah. Mukasuik ambo, kota-kota di nagari urang labiah kumuah dari kota awak,” kato Tan Baro babelok-belok.
“Yo, awak musti akui kalau kota awak ko labiah hebat dari nan lain. Saandainyo memang kumuah, tantu indak mungkin dapek panilaian kota barasiah,” kato Angah Piyan.
“Soal nilai tu kan bisa diatur. Zaman kini ko, apo nan indak bisa diatur dek Angah?” Potong Kari Garejoh.
“Mukasuik Kari?”

“Umpamonyo, katiko tim panilai datang, dibao se ka jalan-jalan utamo nan memang barasiah. Sudah tu, diarak ka musajik rancak, tampek balanjo moderen atau kalau bisa cukuik sampai kantua jo rumah  kapalo daerah sajo. Kalau di tampek-tampek itu tantu iyo barasiah kasadonyo. Tapi, cubolah bao ka tangah balai, sarupo ka pasa raya, atau ka komplek-komplek parumahan sederhana, barangkali kanyataannyo akan jadi lain,” baleh Kari.

“Bia se lah! Manga itu pulo nan awak urus. Nan pasti, kota awak lah dapek piala, abih carito. Jan awak jadi asbun, kalau kamanyakiti parasaan urang lain. Kini syukuri se lah apo nan lah dapek. Dek ambo indak masalah Adipura atau kota kumuah nan taraso dari tadi doh,” tibo-tibo Uncu Labai basuaro.

“Apo tu, Ncu?” Tanyo Tan Baro.
“Ko ha! Tanyato ado tujuah puluah kosmetik di nagari ko babayo untuak kasehatan. Kalau nan sarupo iko indak awak awasi, bisa-bisa anak gadih di siko manjadi korban,” jawek Uncu sambia mampacaliak-an barita nan bajudul ’70 Kosmetik Berbahaya’.

“Ck…..ck….., iko iyo babayo mah,” suaro tu kalua dari muncuang Angah.

“Nan punyo anak gadih, agiah taulah tu. Jan beko dek arok nio rancak, bisa manjadi bacak-bacak muko tu. Kalaulah bacak, tantu bantuak macan tutul atau sarupo kudo zebra. Kalau binatang tu, samakin bacak, samakin maha pulo haragonyo. Tapi kalau anak gadih awak bacak-bacak mukonyo, indak disapo dek laki-laki doh,” kato Tan Baro.

“Awak ko kan talampau moderen. Kosmetik kalau indak dari lua nagari, indak dipakai. Urang saisuak hanyo pakai badak bareh atau bakasai senyo, rancak-rancak juo nyo,” solang Kari.

“Kalau anak gadih kini pakai badak bareh, tantu baun lasuang tingga dibueknyo,” kato Udin Kuriak nan dari tadi nampak anok sajo. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: