//
you're reading...
Palanta

Nagari Lawak

Indonesia adolah nagari nan paliang banyak urang galak. Iko indak sumbarang takok se doh, tapi dari jajak pandapek nan dibuek di lua nagari, yaitu dari Swedia.

Karano itu adolah barita baru nan ditulih dek surek kaba ‘Singgalang’, lansuang se dijadikan bahan ota dek komunitas lapau Uwo Pulin. Malah, barita tu labiah hebat pulo kalau dibandiangkan jo barita masalah Pak Gubernur atau masalah calon presiden.

“Ko nyo ha….!” Sorak Kari Garejoh nan mambuek kawan-kawannyo takajuik.
“Apo tu, Kari?” Tanyo Tan Baro.

“Nagari awak ko paliang banyak galak, kecek urang Swedia. Cubo takok dek Tan Baro, baa kok banyak urang galak atau senyum di siko?” Jawek Kari sambia batanyo ka konco palangkinnyo tu.
“Itu karano urang-urang di nagari awak ko ramah dan santun. Kan itu pulo nan manjadi paimbau urang bule datang ka mari,” jawek Tan Baro.

“Itu baru ciek pandapek. Kalau manuruik nan lain baa?” Tanyo Kari baliak, saolah-olah sadang mancari alasan nan tapek.
“Karano awak pakai muncuang. Cubo indak pakai muncuang, jo apo awak galak?” Jawek Tacin sambia galak.
“Karano awak pakai prinsip, bia rimau dalam paruik, kambiang juo kaluanya,” kato Mak Pono.
“Karano nagari awak ko talatak di tangah, yaitu di garih Khatulistiwa,” jawek Angah Piyan pulo.
“Jawek tuan-tuan bisa ditarimo. Tapi manuruik ambo, ado nan paliang tapek,” baleh Kari.

“Apo?”

“Karano di nagari awak ko banyak palawak. Indak sajo di televisi, tapi juo ado di kantua wakia rakyaik, ado di kantua pamarentah. Apolai kalau di tampek lain, labiah banyak lai,” jawek Kari.
Agak tamanuang juo nan lain mandanga pandapek Kari. Dipkia diinok-manuangkan, iyo pulo mah kironyo.

“He….he….. iyo yo. Di kantua wakia rakyaik se banyak palawak atau urang-urang nan lawak, tantu di dalam masyarakaik labiah banyak pulo. Malah, politik awak ko labiah banyak politik lawak. Jadi, kalau banyak urang galak dek mancaliak tingkah jo kurenah politikus, itu indak aneh gai tu doh yo,” Tan Baro saolah-olah mangecek untuak dirinyo surang.

“Jadi awak ko memang labiah banyak galak. Karano itu, galak ko ado pulo pambagiannyo. Ado galak manih, galak sengeang, galak masam, galak mancimeeh, galak berang, galak kubin, galak kudo sampai ka galak urang gilo. Kadang-kadang, indak tantu ujuang pangkanyo, nan awak lah sato pulo galak,” Kari samakin mampajaleh pandapeknyo.

“Ha….ha….. Galak Urang, galak lo awak. Nan digalak-an urang tu awak,” salo Angah.
“Karano itu, mari awak galak basamo-samo sabalun dilarang. Sabab, ambo agak kuatir, kalau sampai galak tu dilarang atau ado pulo undang-undangnyo, mati wak dibueknyo,” tambah Kari.
“Baa pulo ado undang-undang galak? Iko indak masuak aka doh,” sambuik Uncu Labai.

“Indak ado nan indak masuak aka doh, Ncu. Kan di nagari awak ko banyak aturan jo undang-undang. Saketek-saketek dibuek aturan jo undang-undang, tapi dalam palaksanaannyo, banyak nan indak jalan. Iko juo tamasuak nan lawak,” jawek Kari.

Sakali ko Kari batua-batua manjadi bintang di lapau Uwo. Hanyo modal ‘galak’, Kari bisa labiah manguasoi palanta sapagi tu. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: