//
you're reading...
Palanta

Mamandian Kudo

Wakia walikota Padang talambek satu satangah jam di rapek dewan. Kajadian nan dijadikan barita dek surek kaba ‘Singgalang’ tu lah dipaotakan pulo di lapau Uwo Pulin. Bamacam pandapek maluncua dari muncuang urang-urang nan minum pagi tu.

“Kok tibo di anak sikola, iko lah duo jam palajaran talambeknyo mah Kari. Samaso awak sikola dulu, talambek duo jam tu, indak buliah lai masuak dan harus babaliak pulang,” kato Tan Baro.
“Yo, mungkin se apak ko takana maso-maso sikola dulu. Dicubo-cubo pulo talambek, apo masih bisa masuak atau indak,” baleh Kari Garejoh sambia galak manih.

Kawan-kawan lain lah sato pulo galak. Karano jawek Kari tadi tu asa lai jadi se. Indak mungkin pulolah surang wakia walikota indak buliah masuak ka kantua dewan hanyo karano talambek. Apolai, apak tu talambek dek ulah acara di tampek partamo talambek lo dimulai. Kasudahannyo talambek baruntunlah barang tu.

“Kalau di sikola, anak murik talambek iyo disuruah pulang. Tapi, tibo di apak wakia ko, sidang dewan nan tapaso talambek dibueknyo, Tan!” Sorak Angah Piyan sambia galak.

“Kecek guru awak dulu-dulunyo, kalau guru kajamban tagak, anak murik kajamban balari,” kato Udin Kuriak pulo.
“Iko indak masalah guru kajamban doh, Din, tapi pak wakia walikota talambek satu satangah jam,” potong Tacin.
“Mukasuik ambo, kalau pamimpinnyo talambek satu satangah jam, tantu rakyaiknyo juo biaso talambek labiah dari itu. Atau, kalau ka kantua wakie rakyaik talambeknyo satu satangah jam, bisa-bisa di acara rakyaik talambeknyo tantu duo kali itu,” baleh Udin juo sambia galak.

“Itulah, indak mudah manjadi pamimpin tu doh. Surang pamimpin musti manjadi tuladan dalam nagari. Apo sajo tingkah jo kurenah pamimpin ka manjadi padoman dek rakyaik,” kecek Tan Baro.
“Pamimpin juo musti bak cando mamandian kudo, Tan!” Sorak Uncu Labai.

“Indak ado pamimpin nan pakai kudo kini lai doh. Pamimpin awak kini paliang randah pakai Innova,” Tacin manyorong sakali lai. Memang, baitulah parangai Tacin nan hanyo labiah suko mamotong ota kawannyo jo galeme. Karano itu pulo, kadang-kadang apo nan dikatokan Tacin indak didanga dek konco-konconyo.

“Harusnyo memang sarupo itu. Surang pamimpin harus bantuak mamandian kudo. Kalau ado urang bagotongroyong di dakek tampek tingganyo, inyo musti datang duluan ka tampek tu. Kalau ado warga nan dalam kasusahan, inyo pulo andaknyo nan labiah daulu manolong. Tapi, pamimpin awak kini, sabalun banyak dan sabalun maleleh paluah urang dek manunggu, nan inyo alun ka datang lai. Pamimpin awak kini suko ditunggu. Kasudahannyo, sabalun datang pajabaik tu, alun dimulai pulo acara,” sambuang Uncu.

“Makonyo, itulah sababnyo kini urang bagaduru untuak manjadi pamimpin. Awak dihormati, diaguang-aguangkan, diagiah pasilitas langkok-langkok,” baleh Angah. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: