//
you're reading...
Palanta

Lah Gaek

Barita kapa tabang tantara jatuah manjadi buah ota di lapau Uwo. Baa ka indak? Salamo iduang urang-urang nan ado di lapau tu ditampuah angok, sakali ko baru mandanga, mambaco sarato mancaliak kapa tabang tantara jatuah sampai banyak nan maningga dunia.

Sabalun-sabalunnyo, lai ado juo kapa tabang tantara jatuah, tapi hanyo kapa tabang ketek atau sakadar kapa tabang untuak latihan. Kalau pun ado nan maningga deknyo, indak sabanyak kajadian kapatang tu.
“Iko sajarah hitam di dunia kapa tabang tantara awak mah. Sabalun-sabalunnyo lai ado juo nan jatuah, tapi indak kapa tabang gadang,” kato Angah Piyan.

“Awak patuik baduka. Karano nan maningga tu adolah dunsanak awak. Urang Indonesia juo. Malah, di barita koran ‘Singgalang’ hari ko, tanyato juo ado urang awak,” kato Tan Baro.

“Yo, iko adolah musibah. Bak kato urang tuo-tuo awak, mujua bahari-hari, malang sakijok mato. Mujua indak dapek diraiah, malang indak dapek ditulak. Barangkali jo doa bisa awak tolong kaluarga korban tu. Mudah-mudahan nan maningga bisa manjadi fisabilillah dan nan ditinggaannyo bisa tabah sarato dipatinggi imannyo. Kalau kini di urang-urang tu tibo musibah sarato kamatian, mano tau beko atau bisuak giliran awak nan di lapau ko,” kato Uncu Labai pulo.

Samo-samo tamanuang urang di ateh palanta lapau tu mandanga kato-kato Uncu Labai. Apo nan dikatokannyo tu indak bisa dibantah. Mumbang jatuah, kalapo jatuah!

“Batua! Awak hanyo bisa badoa. Cuma paralu pulo awak kaji kajadian tu. Manuruik ambo, kapa tabang nan ado di nagari awak, tamasuak kapa tabang tantara, umuanyo lah gaek-gaek. Saumpamo di manusia nan lah gaek disuruah juo lari, tantu sasak angoknyo. Talampau sasak angok, dipasoan juo, bisa tasungkua surang se gaek tu. Baa pandapek Tan Baro?” Sakali ko Mak Pono nan mangecek.

“Indak sadonyo urang gaek panyasak angok doh, Mak. Ado pulo urang gaek labiah tageh dari anak mudo,” sorak Kari Garejoh.
“Itu urang gaek taruang asam mah!” sambuik Mak Pono.

“Nan dikatokan Mak Pono ado juo batuanyo. Kalau dibaco barita di koran atau wak caliak di televisi, memang banyak kapa tabang di nagari ko nan lah baumua tuo atau lah gaek. Barangkali iko paralu manjadi paratian dek pamarentah. Adolah andaknyo batasan umua kapa tabang. Saumpamo makanan he, ado andaknyo bateh kadaluwarsanyo. Apolai kapa tabang kan manyangkuik nyawa urang banyak. Kalau kapa tabang nan lah tuo, pasti banyak pakakehnyo nan awih atau bauik-bauiknyo nan los, bakarek atau mungkin juo tangga,” kato Tan Baro. “Kok dibali, haragonyo maha!” Sorak Uwo Pulin.

“Yo, ijanlah mambali banyak-banyak. Diansua agak ciek atau duo sataun. Kok sakali dibali, awak lo nan indak makan dibueknyo,” baleh Tan Baro.
“Karidik se agak limo buah!” Udin Kuriak mangecek pulo.
“Udin sangko mambali honda?” Baleh Kari.
“Tapi, jan dibali kapa tabang nan pandai ilang,” kecek Angah.
“Pandai ilang baa pulo?” Tanyo Uncu.

“Kan ado pulo kapa tabang di nagari awak sampai kini indak basuo,” jawek Angah sambia manyabuik namo maskapai nan kini lah ilang pulo dari paredaran. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: