//
you're reading...
Palanta

Karidik

Brum…..brum…. Saluruh mato mamandang ka lua lapau. Ruponyo Kudun datang mamakai motor baru.
“Manang bete, dun?” Tanyo sarupo itu maluncua sajo dari muncuang Kari Garejoh. Maklum, salamo ko Kudun datang ka lapau tu mamakai jaso ojek. Karano memang tampek tingganyo jauah di Tunggua Hitam.

“Batanyo lapeh arak, barundiang sudah makan,” hanyo itu jawek Kudun sambia taruih masuak ka dalam lapau dan mancari tampek nan strategis.

“Baru baambiak, Dun?” Giliran Angah Piyan pulo nan batanyo. Tantu sajo Angah batanyo sasudah Kudun maraguak kopi saraguak nan dihidangkan dek Uwo Pulin.

“Lah jalaih di BA-nyo tatulih DICOBA, Angah batanyo juo,” potong Ajo Tondeh sambia galak manih.
“Iyo, barang karidik. Kok kontan jo apo diambiak? Jankan untuak pambali motor, pambali bareh se lah payah awak. Iko kamanakan ambo nan mintak tolong maambiak motor karidik, karano inyo indak punyo katepe siko. Jadi, iko barang karidik punyo kamanakan ambo,” jawek Kudun manjalehan.

“Bara depenyo, Dun?” Tanyo Tacin.

Mako dijalehanlah dek Kudun, untuak uang mukonyo lai indak banyak bana doh. Apolai ado paket-paket khusus nan disadiokan dek dealer sarato hadiah, tamasuak namonyo baliak pitih atau istilah asiangnyo kesbek.

Sasudah Kudun manjalehan motor nan dibaonyo tu, mako saolah-olah ado se kasapakatan urang-urang tu untuak manjadikan masalah karidik untuak bahan ota. Apolai di laporan surek kaba ‘Singgalang’ Minggu juo masalah karidik-karidik barang.

Manuruik pandapek urang-urang tu, kini untuak mambali kandaraan atau pakakeh elektronik, indak paralu pakai pitih banyak. Hanyo modal saketek, ditambah katepe jo karatu kaluarga, lah bisa dapek motor. Baitu juo oto, hanyo modal sakitar sapuluah parsen dari haragonyo, mako oto lah bisa dibao pulang.

“Kok nio kandaraan baru memang gampang. Tapi untuak bisa mampatahankan kandaraan tu, suliknyo mintak ampun. Saandainyo awak mangaridik motor, samati-mati angin awak harus mencari pitih pambayia karidik duo puluah ribu. Duo puluah ribu, itu aratinyo anam ratuih ribu sabulan. Kalau indak tabayia, mako kandaraan tu dijapuik dek nan punyo pokok galeh. Indak basuo di rumah, ka pangkalan ojek dijapuiknyo,” kato Tan Baro.

“Tapi kan, motor karidik tu bisa tapokok sampai tigo kali lipek harago kontan?” manyalo pulo Uwo Pulin.
“Kok ka samo lo harago kontan jo karidik, tantu indak mungkin. Dima pulo sikolanyo tu?” Baleh Tan Baro.
“Yo, tapi utak rarak dibueknyo untuak mamikiakan utang sampai ampek taun,” kecek Uwo sakali lai.

“Kalau lai untuak bausao, ambo raso bisa. Kan rato-rato tukang ojek di siko pakai motor karidik. Soal utang, itu kan lah tradisi nagari ko. Ijankan awak, negara se lai bautang. Malah, tambah lamo, utang negara ko batambah gadang,” kato Tan Baro. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: