//
you're reading...
Palanta

Karambia Condong

Tan Baro duduak bamanuang di palanta lapau Uwo Pulin sambia tagak lutuik. Mukonyo nampak agak bakaruik, abuaknyo kusuik.

Sapangatahuan kawan-kawannyo, indak biaso Tan Baro bamanuang sarupo tabali kain cabiak. Kalau pun salamo ko ado masalah, capek-capek diagiah tau ka konco-konconyo, supayo bisa dicarikan jalan kaluanyo.
“Baa Tan, bantuak urang tabali kain cabiak se dari tadi nampak dek kami,” Angah Piyan batanyo.
“Malu awak, malu!” Hanyo itu jawek Tan Baro.
“Malu baa pulo ko? Apo ado anak-kamanakan nan balangkah serong, atau…..?” Baleh Angah samakin indak mangarati.
“Pokoknyo malu! Apo lah mambaco koran Angah?” Kato Tan Baro sambia batanyo baliak.
“Lah, baa tu? Ambo raso indak ado barita nan agak angek apolai nan mambuek malu di nagari awak ko doh,” jawek Angah.

“Itulah kalamahan Angah dan nan lain salamo ko. Mambaco hanyo nan tatulih. Padohal, awak di Minangkabau ko musti pandai mambaco nan tasurek jo nan tasirek. Kalau hanyo nan tasurek sajo, anak ambo nan masih di te-ka, juo pandai,” sambuang Tan Baro.
Angah Piyan tamanuang mandanga kato-kato Tan Baro. Baitu juo kawan-kawan lain, nampak tapana sajo.
“Sudahlah, Tan! Kalau indak namuah lai babagi masalah jo kami, itu hak Tan Baro,” kini giliran Uwo Pulin nan basuaro.
“Eh….., manga pulo ka sinan painyo Wo!” Baleh Tan Baro.
“Kalau indak, apo masalahnyo nan sampai mampagadang malu, eh mambuek awak malu?” manyemba baliak Angah Piyan.

“Ambo sacaro pribadi maraso malu, karano lomba lagua-lagua Minang justru nan manang tu urang Batawi. Labiah malu pulo, katiko juri batanyo carito Siti Nurbaya ka surang paserta dari Minang, tapi inyo indak bisa manjawek,” kasudahannyo Tan Baro maagiah tau juo apo nan tadi tapikia dek inyo.

“Apo…..? Urang Batawi manang lomba lagua Minang?” Tibo-tibo Mak Pono basuaro pulo.
“Yo, itulah nan tajadi. Anak-anak mudo awak nan sato di lomba tu hanyo bisa mauruik dado sajo mancaliak oto Avanza bukak karateh diracak dek anak mudo Batawi,” baleh Tan Baro.
“Lai indak salah jurinyo tu?” Sorak Kari Garejoh dari jauah.

“Ambo raso indak. Kalau bantuak itu pandapek Kari, itu samo jo manari nan indak pandai, dikatokan pulo lantai nan guyah,” jawek Tan Baro.
“Mamaga karambia condong mah, Tan. Batangnyo lai di parak awak, tapi buahnyo jatuah ka parak urang,” giliran Uncu Labai sato mangaluakan pandapek.

“Yo, kiro-kiro sarupo itulah kajadainnyo. Maso iyo awak nan urang Minang tulen, apak-mande urang Minang, tapi nan manang jo lagua-lagua Minang adolah urang Batawi nan apaknyo urang Sunda,” sambuik Tan Baro.
“Tapi, urang awak kan santiang-santiang balagua barat,” kato Kari baliak.

“Yo, hebat mah. Dek ulah lagua barat, lupo jo lagua Sumatra Barat. Ciek lai, lagu barat nan dilaguakan tu indak pulo inyo tau apo aratinyo. Kasudahannyo, urang nan mandanga indak mangarati, nan malagua juo indak tau. He…..he….,” baleh Tan Baro sambia galak.

Baitulah ota di lapau Uwo Pulin. Ota panjang tu bamulo dari barita di surek kaba ‘Singgalang’ nan bajudul: ‘Anak Jakarta Juara Minang Talenta’. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: