//
you're reading...
Palanta

Kapalo Samo Babulu

“Sipiciak baduri-duri, batang lansek bagatah-gatah. Dewan nan cadiak ka lua nagari, urang kampuangnyo mamintak sidakah.”
Baitu pantun Uncu Labai nan baru salasai mambaco koran di palanta lapau Uwo Pulin.
Kawan-kawannyo tacangang. Maklum, lah lamo indak mandanga pantun-pantun sarupo itu.
“Baa Ncu? Ado nan aneh?” Tanyo Mak Pono.
“Iko ha….., anggota dewan awak nan tahormat sangaik tu lah pai pulo ka lua nagari,” jawek Uncu.
“Kan rancak tu…., daripado bakuruang se sarupo koncek di bawah tampuruang di siko. Bilo juo lai? Katiko ado kasampatan ko nyo! Apolai bulan bisuak ko ado Pamilu. Antah lai ka tapiliah, antah indak. Makonyo katiko ado kasampatan ko, dicubo bana. Kan bisa pulo untuak bahan carito ka kawan-kawan, dunsanak atau urang kampuang gai,” kato Mak Pono.
“Aponyo nan rancak dek Mamak? Nan pai tu cuma duo urang se nyo, dan kabanyo indak pulo mintak izin ka katua,” baleh Uncu.
“Ah, nan ka iyo-iyo se lah Ncu. Ijan dibuek juo isu-isu baru lai. Lah bantuak iko pandangaran, indak baraliah dari talingo, Uncu masih juo mambuek isu-isu murahan sarupo itu. Beko dipolitisasi pulo dek urang lain,” tibo giliran Kudun mangecek dari suduik.


“Iko indak isu doh, Kudun! Iko barita surek kaba nan ambo sampaikan. Kalau indak picayo, caliaklah barita ko ha!” Baleh Uncu jo suaro agak kareh.
Sarantak se mato mamandang ka surek kaba nan dikambang Uncu. Malah, nan jauah tapaso bajalan ka tampek duduak Uncu supayo bisa mamastikan barita tu.
“Manga apak-apak tu ka lua nagari?” Malin Kacindin nan indak baranjak dari tampek duduaknyo batanyo.
“Kalau manuruik barita di surek kaba awak ko, inyo tu mandampiangi Pak Wali, mancari investor,” jawek Uncu.
“Apo Ncu? Lai indak salah tu? Biasonyo nan mandampiangi kapalo daerah tu adolah kapalo dinas atau katokanlah pihak eksekutif. Untuak mancari investor, ado pulo lembaganyo. Kalau indak salah ambo, lembaganyo tu Badan Penanaman Modal,” kini giliran Tan Baro nan mangecek.
“Lai indak manjadi ajudan atau tukang jinjiang tas Pak wali!” Sorak Kari Garejoh.
Baitulah ota di lapau Uwo Pulin. Sarupo biaso, apo nan dipaotakan basumber dari barita-barita angek di surek kaba ‘Singgalang’. Kabatulan di hari kapatang surek kaba urang awak ko mambaritakan duo urang anggota dewan pai kalua nagari. Kabanyo, apak-apak tu pai indak saizin dari katua. Ciek lai, indak jaleh pulo sumber pitihnyo.

“Kalau baitu, namonyo malangkahi katua. Tapi sungguahpun baitu, walau ado bana izin dari katua, dalam kondisi nagari nan sarupo iko, indak sapantasnyo wakia rakyaik tu pai ka lua nagari jo pitih puluahan juta. Karano, rakyaik nan diwakilinyo tu iduiknyo banyak nan sansaro. Malah, bak pantun Uncu tadi, masih banyak dunsanak awak nan mamintak sidakah di simpang lampu merah, di pasa atau di rumah-rumah makan,” kecek Angah Piyan.
“Ah, itu kan teori Angah. Ambo raso, urang nan mangecek atau mangaritik tu labiah banyak karano iri atau bingik. Ambo indak bisa bayangkan, santano Angah nan manjadi anggota dewan, mungkin tiok taun ka lua nagari,” lah sato pulo Tacin Barain mangecek.

“Indak! Iko indak ado masalah iri atau bingik. Kalau sajo awak tanyo ka urang sakota nan laweh ko ha, pasti rato-rato indak katuju jo kurenah kaduo anggota dewan tu. Baa manuruik Tan Baro?” Baleh Angah mampaiyokan ka konco palangkinnyo.
Tan Baro hanyo galak sengeang. Dalam hatinyo juo indak sasuai jo caro-caro sarupo itu. Karano, di dalam nagari ko masih banyak masalah nan musti dicarikan jalan kaluanyo. Kalau sajo pitih untuak ongkoih ka lua nagari tu dijadikan modal untuak urang bansaik, rasonyo banyak juo nan tatolong. Tapi, baalah mangatokannyo, kapalo nan samo babulu, pandapek balain-lain. Kok samo se pandapek urang ko, indak rancak pulo. Ibaraik balagu, kalau hanyo ciek se bunyi gandang tantu indak lamak tadanganyo. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: