//
you're reading...
Palanta

Kapalo Labi

Lapau Uwo Pulin indak pernah langang. Baa bana rumiknyo ekonomi dunia sarupo nan dirasokan dek banyak negara kini ko, nan rang palapau lai taruih juo duduak di palanta. Indak hanyo sadang sabanta, ado nan dari pagi sampai siang, duduak maota di lapau sambia minum jo mambaco barita di surek kaba. Malah, sampai putiah baliak aie kopi dek acok ditambah, indak masalah.

Untuak itu pulo Uncu Labai punyo pantun:

‘Baa bana guruah hari, nan kapa di lawik juo, Baa bana suliknyo ekonomi duduak di lapau paralu juo’

Baitu bana candunyo duduak di lapau dek komunitas lapau Uwo Pulin. Maklum, duduak di lapau indak hanyo sakadar minum kopi atau maota ilia-mudiak indak manantu, tapi di situ bisa manambah ilimu. Karano di lapau tu ado surek kaba ‘Singgalang’ nan lah manjadi padoman dalam sagalo pakambangan dunia. Memang agak babeda jo lapau-lapau lainnyo di nagari ko. Ota urang di lapau Uwo agak intelek. Karano, nan dipaotakan biasonyo adolah informasi-informasi nan lah manjadi barita di surek kaba atau di televisi. Sarupo kapatang, ota nan agak lamo adolah masalah panggaleh kaki limo. Bamulo dari judul barita; ‘Dirazia Pergi, Kemudian Datang Lagi’. Mukasuiknyo, urang-urang manggaleh di kaki limo nan didatangi dek patugeh pol pe-pe, sabanta tu bisa ilang atau pai. Tapi, kalau patugeh lah bajalan babarapo langkah sajo, nan panggaleh ko mambukak galehnyo baliak di tampek tu.

Kari Garejoh manyamokannyo jo labi, penyu atau kura-kura. Katiko diresek, kapalo labi tu tasuruak ka dalam badannyo nan kareh. Tapi, kalau indak ado lai nan maintai, kapalo labi tu lansuang tacaguik. Samakin lamo, kapalonyo samakin panjang kalua. “Lai pernah Mak Pono mancaliak labi atau penyu?” Tanyo Kari. “Binatang apo pulo nan indak pernah ambo caliak dek Kari ko? Labiah daulu ambo mancaliak dunia dan labiah daulu pulo mamakan garam dari Kari. Ijankan labi, niniak moyang labi lah pernah ambo caliak,” baleh Mak Pono nan disambuik galak dek komunitas lapau tu. “Baa Kari? Taaja baruak mamanjek!” salo Tacin. “Bakecek-an baruak baa pulo Mak Pono, Cin!” Semba Ajo Tondeh.

“Itu Ajo nan manyamokan Mak Pono jo baruak mah. Mantang-mantang akrab jo baruak, urang lain disamokan pulo jo induak bako awak tu,” baleh Tacin indak namuah kalah. Ajo indak manjawek. Inyo maraso takanai dek kato-kato konconyo tu. Dalam pangananyo tadi, Tacin bisa kanai skak, tapi tanyato babaliak awah panabangan. Baitulah ota di lapau Uwo. Walau ado galeme sarato garahnyo, tapi apo nan dikatokan Kari Garejoh dari samulo bisa dimangarati dek nan lain. Karano dalam kanyataannyo rato-rato panggaleh di kaki limo iyo indak baraa beda jo labi atau penyu. Patugeh razia datang, urang panggaleh bakameh. Sampai tangga bagai kain saruang dek mangamehan barang-barang. Tapi, kalau patugeh razia lah pai, nan urang panggaleh bajualan baliak di tampek samulo.

“Supayo indak sarupo kapalo labi, pamarentah paralu mancarikan tampek manggaleh nan ka bisa bajua-bali dek urang-urang tu. Kalau hanyo dirazia tiok sabanta, ambo raso indak ka bisa. Karano, panggaleh kaki limo ko samo jo samuik. Dima ado gulo, inyo lah datang pulo ka situ. Apolai, awak tau bana, rato-rato urang manggaleh kaki limo tu hanyo maarok pitih saribu duo ribu sajo untuak panyambuang iduik anak-bininyo. Kalau hanyo dirazia sampai disipak-sipak bagai galehnyo, tapi indak dicarikan tampek nan rancak, mako itu samo se jo pambunuahan barancana,” Tan Baro mancubo mangaluakan pandapeknyo. Kari sarato kawan-kawan lain lah maangguak-angguak bantuak balam nio kawin. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: