//
you're reading...
Palanta

Japuik Bola

Ikolah sabananyo nan dinanti-nanti dek urang banyak. Ado palayanan rancak dari pamarentah untuak masyarakaik, tarutamo dalam mambuek ka-te-pe, akte atau lainnyo. Salamo ko, masyarakaik maraso payah untuak maurus duo pakaro tu.

Payah, indak hanyo karano pakai pitih, tapi masalah wakatu. Nan diurus ciek akte atau ciek ka-te-pe, tapi wakatu abih duo atau tigo hari bagai. Urang-urang nan baurusan kadang-kadang sarupo bola pimpong, ditokok ka sinan ka mari. Kok tacogok saketek, disimis.

Kini, pamarentah di kota ko mamakai caro japuik bola. Aratinyo bana, urang-urang nan malahiakan anak, indak musti bapayah-payah pai maurus akte kalahiran ka kantua catatan sipil. Katonyo, induak paja pulang ka rumah dari tampek malahiakan lansuang akte anak ditarimo.

Walau itu dikatokan dek pajabaik, tapi Angah Piyan maraso ragu. Karano, dalam pikirannyo banyak di antaro pajabaik di nagari ko nan hanyo bisa mangecek, tapi indak sasuai jo kanyataan.
“Iko iyo lai sabananyo, ko Tan?” Baitu sorak Angah ka Tan Baro nan sadang maota jo Udin Kuriak di sabalahnyo.
“Apo tu?” Tanyo Tan Baro sambia mancaliak ka Angah.

“Iko ha. Ado barita nan mangatokan untuak maurus akte kalahiran indak paralu bapayah-payah ka kantua catatan sipil. Mande paja pulang dari rumah bidan atau dari rumah sakik, nan akte kalahiran lah bisa dibao pulang samo jo anak awak,” kecek Angah maagiah tau apo nan dibaconyo.
“Baa caronyo, Ngah?” Udin Kuriak sato batanyo.

Mako dijalehanlah dek Angah sasuai jo barita surek kaba ‘Singgalang’ tu. “Katonyo, kantua catatan sipil bakarajosamo jo bidan atau rumah sakik basalin. Katiko anak awak lahia, bidan atau dokter nan manangani bini awak lansuang malaporkan ka kantua catatan sipil. Sudah tu, urang catatan sipil maanta blanko atau formulir untuak diisi dek awak. Formulir tu awak agiahan baliak ka urang tu langkok pakai surek nikah, karatu kaluarga bagai. Sudah tu awak mananti se lai,” jawek Angah.

“Kok iyo lai sarupo itu, rancak bana. Awak indak jariah lai pai ka kantua catatan sipil tu. Kok pai ka sinan, baraa pulo ongkosnyo. Alun lai wakatu awak nan abih dibueknyo. Tapi, ambo agak ragu juo, apo iyo lai bisa dek urang catatan sipil tu malayani masyarakaik nan banyak ko? Kok nyampang dalam sahari tu ado induak-induak malahiakan saratuih urang, apo lai bisa dek inyo malayani? Ciek lai, apo ado jaminan indak pakai pitih? Lai indak ka mintak ongkos atau pambali minyak gai patugas tu?” kato Tan Baro agak ragu.

Samo-samo tamanuang urang di palanta lapau Uwo mandanga karaguan Tan Baro tu. Karano apo nan dikatokannyo tu adolah kato nan sabananyo. Nan pasti sajo patugas di kantua catatan sipil indak sabanyak urang malahiakan. Sudah tu, ado pulo beko nan karajo mamakai prinsip ‘jariah manantang buliah’. Aratinyo bana, mintak pambali minyak atau pambali rokok bagai ka kaluarga nan malahiakan anak.

“Nan malahiakan di dukun baranak baa pulo, Ngah?” Tibo-tibo Kari Garejoh batanyo.
“Indak masuak etongan doh. Kok nyampang bini Kari malahiakan di dukun bisuak, urus surang ka kantua catatan sipil,” pinteh Tan Baro.
“Taancam mato pancarian mintuo kawan!” Kato Ajo Tondeh bagulambek sambia mancaliak jo suduik mato ka Kari.
Tabasuik galak urang-urang di lapau tu sakali lai. Maklum, nan dimukasuik Ajo tadi adolah mintuo Kari Garejoh. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: