//
you're reading...
Palanta

Jan Salahkan Alam

“……usah tabang sumbarang tabang
jikok lai takuik datang galodo…
urang kampuang sawah jo ladang….
nan taniayo….
Danga pasan unggeh jo buruang
tolonglah kami nan lamah nan ko
rimbo tampek kami balinduang….
jan ditabang juo….”

Baitu kiro-kiro potongan lagua Minang nan takana dek Uncu Labai. Antah lai batua urutannyo antah indak, namun lagu sarupo itu diulang-ulangnyo juo sambia duduak minum kopi di palanta lapau Uwo Pulin.
Di surek kaba ‘Singgalang’ nan baru sajo dibaconyo, saolah-olah hanyo musibah galodo sajo barita nan ado. Malah, babagai foto musibah tu dipampangkan pulo banyak-banyak.

Karano itu juo, ota di lapau tu hanyolah masalah musibah nan baru sajo tajadi. Apolai, televisi dari Jakarta saluruhnyo mambaritakan pulo kajadian tu.
Tan Baro masih takana kajadian taun 1979. Katiko itu inyo masih es-de. Mandanga ado galodo di Pasie Laweh, inyo pai pulo ka sinan naiak sepeda unto. Mancaliak bana Tan Baro jo mato kapalo surang, baa ganasnyo galodo malajang apo sajo nan ado. Sawah, ladang, rumah, batang kayu sarato manusia lanyok sakutiko. Lamo juo Tan Baro tamanuang katiko itu.

“Bantuak ikolah, kalau Tuhan bakahandak. Indak ado ciek juo nan bisa maambek,” kato Tan Baro.
“Itulah kakuasaan Tuhan. Sia nan bisa manyangko sarupo kajadian kapatang atau kajadian di Tangerang. Di situlah rasio Tuhan,” baleh Uncu Labai.

“Tandonyo alam indak basahabat lai jo manusia,” potong Udin Kuriak.
“Ijan salahkan alam, Din. Nan alam ko indak ka pernah protes ka manusia doh. Karano, apo nan ado di alam ko disadiokan saluruhnyo untuak manusia. Masalahnyo di siko, awak salaku manusia indak pandai batarimokasih. Awak banyak nan ongeh, labiah suko marusak alam tu dan indak pandai manjagonyo,” semba Uncu.

“Batua! Dulu lah pernah pulo bakali-kali awak paotakan di lapau ko. Kito-kito ko banyak nan sombong, labiah suko marusak. Manabang kayu salamak paruik se. Awak indak bapikia, karajo tu maundang bancano. Kan lai awak palajari samaso sikola dulu, urek-urek kayu tu gunonyo untuak panahan aie. Samakin labek rimbo di ulu, samakin aman awak di baruah. Tapi, samakin dirambah rimbo di ulu, samakin tarancam awak di ilie,” kato Tan Baro pulo.
“Jadi, baa mustinyo lai?” Tanyo Udin.

“Awak harus sadar jo fungsi kayu-kayu di rimbo atau di ulu batang aie. Ijan sumbarang tabang se,” jawek Tan Baro.
“Ciek lai, jan pernah manyalahkan alam bantuak tadi. Batambah berang Tuhan ka awak beko!” Potong Uncu baliak.
Baitulah ota di lapau Uwo. Kajadian galodo di Luak nan Tuo jo Luak Agam dijadikan bahan evaluasi. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: