//
you're reading...
Palanta

Jan Lupoan Jaso Tanah

Nagari awak iyo sabana hebat. Dari 19 kabupaten jo kota nan ado, sambilan di antaronyo bisa mandapek Piala Adipura. Piala ko tando nagari ko lai barasiah. Saindak-indaknyo barasiah katiko ado tim panilai. Atau barangkali juo barasiah di tampek-tampek nan manjadi sasaran dek tim panilai. Kalau dikatokan barasiah saluruhnyo, tantulah carito mustahil.

Tando hebat tu nampak pulo dalam barita di surek kaba ‘Singgalang’. Mulai dari laman muko sampai laman dalam ado barita sarato fotonyo. Baitu juo ado iklan-iklan salamaik dari pihak-pihak nan basimpati atau punyo kapentiangan jo kaparaluan.

Karano memang hebat, mako itu pulo nan dijadikan bahan ota dek komunitas lapau Uwo Pulin. Rato-rato urang nan ado di palanta lapau tu maraso sanang sarato bagadang hati.

“Awak memang patuik bagadang hati. Karano, Piala Adipura tu kan lambang nagari barasiah. Aratinyo, nagari urang tu jauah labiah kumuah dari nagari awak. Walau awak juo indak manutuik mato mancaliak kanyataan nan ado, sarok masih baserak, cirik kudo bateak-teak, tapi di mato tim panilai, kota awak ko labiah barasiah daripado kota-kota lain. Iko paralu awak syukuri. Kan baitu ndak Tan Baro?” Kato Uncu Labai mampaiyokan pandapeknyo ka konco palangkinnyo.

Tan Baro hanyo maangguak sambia galak manih sajo. Walau kota tampek tingganyo indak ubahnyo rancak di labuah, namun inyo juo sato bagadang hati.

“Cuma ciek dek ambonyo. Kok kanyataannyo kan lah samo-samo wak caliak. Walau masih banyak tampek-tampek nan kumuah, kota awak ko dapek Piala Adipura. Kok kandak lai ka buliah, pintak lai ka balaku, ijanlah sampai awak lupo jaso urang. Mukasuik ambo, nagari ko barasiah karano patugeh kabarasiahan bakarajo indak tantu siang jo malam. Kok paneh, batuduang langik, kok hujan basah kuyuik kadinginan. Jaso urang-urang ko paralu dikana dan diagiah hadiah pulo. Jan sampai dek manih tabu, lupo jaso tanah,” baitu pandapek Tan Baro.

“Sapandapek awak mah Tan. Kalau bisa, agak sakali bao pulo tukang sarok tu ka Istana Negara untuak manarimo piala tu. Jadi, nampak di sinan, inyo nan batanam, inyo pulo nan maambiak buah. Salamo ko kan kapalo daerah se nan dapek namo. Itu kalau bisa. Kalau indak bisa, tu kabaa juo lai,” kecek Kari Garejoh.

“Kan lai tu! Bisuak ko sapuluah urang patugeh sampah diagiah hadiah pai umrah ka Makah,” salo Angah Piyan.
“Nagari ko indak barasiah dek sapuluah urang doh, Ngah. Kok bisa, nan lain juo diagiah hadiah. Umpamonyo diagiah tambahan gaji. Atau nan alun jadi pagawai, diangkek jadi pagawai tatap. Nan anaknyo ka masuak sikola jo masuak kuliah kok dapek ditolong pulo dek pamarentah. Jadi, nampak bahaso awak memang lai indak palupoan jaso. Bak kato Tan Baro tadi, lai takana juo awak jaso tanah nan lah basadio manjadi tampek tumbuahnyo tabu,” baleh Kari.

“Kok nan alun babini baa?” Tanyo Udin Kuriak.
“Nan alun babini, carian bini dan agiah pitih untuak biaya baraleknyo. Hanyo jo caro-caro sarupo itulah awak bisa maaragoi jaso urang. Picayolah, kok indak dek patugeh sarok tu, indak ka barasiah nagari ko doh,” jawek Kari.

Samo-samo maangguak urang nan ado di dalam lapau tu mandanga pandapek Kari. Karano memang, baitulah kanyataannyo. Kalau indak dek karajo patugeh kabarasiahan nan bagalimang jo sampah nan baunnyo sabana manyalinok ka ubun-ubun, mako Piala Adipura tu indak ka dapek gai doh. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: