//
you're reading...
Palanta

Jan Bao Anak

Kampanye-kampanye nan lah sapakan bajalan di nagari ko manjadi paratian pulo dek komunitas lapau Uwo Pulin. Babagai kurenah manusia nampak di mato kapalo urang-urang tu.
Labiah dari itu, kampanye-kampanye ko juo dibaritakan surek kaba langganan, yaitu koran ‘Singgalang’, mako samakin langkoklah informasi nan didapek Tan Baro sarato kawan-kawannyo. Dari baitu banyaknyo barita nan ditulih surek kaba, ado ciek nan manjadi bahan ota dek urang-urang tu, yaitu masalah anak-anak nan dibao pai kampanye.
Sasuai jo aturannyo, anak-anak nan baumua di bawah anam baleh taun indak buliah pai kampanye. Kalau ado nan basuo mambao, mako itu adolah palanggaran Pamilu.

“Antah untuak apolah anak-anak diosong ka tampek-tampek kampanye tu. Apo indak pernah tabayangkan, kalau-kalau tajadi masalah, saumpamo ado nan bacakak gai di situ, tantu anak-anak ko mati tasapik,” kato Angah Piyan.
“Kadang-kadang mande-bapak anak ko ongok pulo, urang basasak, inyo basasak pulo. Malah, ado pulo nan malapehan sajo anak bak kato anak di tampek urang rami tu. Iko babayo,” salo Uwo Pulin sambia malatak-an kopi untuak Kudun nan baru tibo.

“Bia se lah. Kan sakali limo taun ado kampanye nyo. Apolai di kampanye tu juo ado artis-artis ibukota. Daripado hanyo mancaliak di televisi, kan rancak juo datang ka tampek kampanye tu, bisa pulo basalam gai jo artis,” salo Tacin.
“Batua, tapi bahayonyo kan labiah gadang,” baleh Angah.
“Apo bana bahayonyo?” Tanyo Tacin.

Mako bacaritolah Angah, kalau anak-anak di bawah umua dibao kampanye, itu manyalahi aturan. Nan paliang babayo bana adolah kalau tajadi cakak banyak, baa caro manyalamaik-an diri.
“Kan lah samo wak caliak, kampanye tu ribuan urang nan datang. Kok nyampang buruak disabuik, tapijak anak tu dek urang rami, apo ka tenggang badan awak? Ka sia awak mangadu? Apo lai lansai dek baju kaus sarato ongkos oto nan duo puluah ribu tu,” kecek Angah.

“Tapi, kalau ditinggaan di rumah nan labiah babayo lai, karano indak ado nan mangasuah,” Tacin indak namuah kalah.
“Kalau baitu, indak usah se pai kampanye! Baa manuruik Tan Baro?” manyalo pulo Kari Garejoh sambia mintak pandapek ka konconyo.

Kalau awak bapadoman ka aturan nan lah ado, mako ijanlah sampai mambao anak ketek pai kampanye. Sarancaknyo anak-anak tu dipabiakan bamain di rumah. Bak kecek Angah tadi, banyak bahayonyo mambao anak baincik-incik kampanye,” jawek Tan Baro.
Sarupo itulah suasana lapau Uwo Pulin kapatang. Sarupo biaso, hari Akaik, banyak urang nan duduak di palanta lapau tu.

“Manuruik ambo, indak baa anak-anak tu sato pai kampanye doh. Jo caro itu inyo baraja bakampanye. Jadi, kalau inyo lah gadang isuak, bisa pulo kampanye sarupo nan dicaliak kini,” Pak Osu nan lah lamo indak ka lapau, lah sato pulo mangaluakan pandapek.
“Yo, bisuak bao sakalian jo cucu Pak Osu nan lahia kapatang,” baleh Angah Piyan. Espe St.Soeleman

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: