//
you're reading...
Palanta

Indak Aneh

Kota Padang tarancam indak mandapek piala Adipura. Barita sarupo itu di pikiran komunitas lapau Uwo Pulin indak barang aneh. Malah, apo nan ka tajadi tu lah pernah babarapo kali jadi bahan ota.
Karano itu, ado pandapek, apo nan dikatokan pajabaik masalah Adipura tu, dianggap makanan lah basi. Alasannyo, itu lah dibahas di lapau Uwo.

Walau baitu, kondisi nagari Padang terkini masih juo angek untuak dipaotakan. Rato-rato, urang di palanta lapau tu sabana prihatin mancaliak sarok sampai cik kudo nan baserak-serak.
“Lai mah tau apak-apak tu, nagari ko indak ka dapek Adipura, tapi baa kok anok se salamo ko?” Kato Udin Kuriak salasai mambaco barita nan dimuek koran ‘Singgalang’.

“Basorak bana pajabaik tu kalau indak didukuang dek unsur lain, ambo raso indak juo ado aratinyo. Pakan kapatang ado barita nan mangatokan oto sarok banyak rusak, tapaso dikandangkan sajo. Masalahnyo, onderdil oto tu indak ado urang manjuanyo di siko. Kalau nio dipaelok-i, harus dibali ka Cino. Nah, salamo mananti onderdil dari Cino, nan sarok manggunuang juo. Makonyo hari tu ambo mausulkan supayo oto sarok tu untuak samantaro diganti se jo padati. Kan padati indak paralu pakai solar, oli dan indak pulo paralu mambali onderdil ka lua nagari,” kato Kari Garejoh.

“Dek ambo indak hanyo itu. Salain sarok, nan mambuek nagari ko indak bisa manarimo Adipura, karano banyak cik kudo di sapanjang jalan. Kalau indak picayo, cubolah paratikan jalan-jalan dalam kota, tamasuak jalan protokol, cik kudo baserak-serak,” solang Tacin Barain.

“Ambo kurang sapandapek jo tuan-tuan. Manuruik ambo, kota awak ko masih bisa mandapek piala Adipura-pura,” kato Mak Pono.
“Indak Adipura-pura doh Mak, tapi Adipura!” Sorak Tan Baro.
“Sumbarang namonyo lah!” baleh Mak Pono.
“Apo dasar Mamak?” Potong Kari.

“Awak bisa mandapek piala tu kalau tim panilainyo dibao ka kantua gubernur, ka kantua walikota sarato kantua-kantua pamarentah lainnyo. Sudah tu bao pulo ka hotel-hotel babintang. Tim panilai tu musti malinteh di jalan-jalan rancak dan barasiah sajo. Ijan sampai nyo mancaliak jalan-jalan ketek dan indak buliah masuak pasa. Nan paliang manantukan, harus taba palampoknyo. Sudah tu, kalau tim tu baliak ka Jakarta jan lupo pulo bakirim karipik balado, randang, tambah oleh-oleh lainnyo,” jawek Mak Pono.

“Kok itu caronyo, lah jaleh mah,” baleh Kari.
“Eh…., namonyo sajo piala Adipura-pura, tantu babagai caro wak buek supayo nagari ko nampak hebat taruih. Manga itu, sadangkan untuak mandapek Muri se, bisa dek awak. Manga untuak nan lain indak bisa?” Gaek tu indak namuah kalah.

Baitulah suasana di lapau Uwo. Ado-ado se nan dijadikan bahan ota. Ciek lai nan indak mambosankan di lapau tu adolah garah jo galak. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: