//
you're reading...
Palanta

Ibo Awak

“Yo lah sabana payah iduik kini,” kato Malin Kacindin nan sadang mambaco surek kaba ‘Singgalang’. “Sajak dulu lah payah juo nyo!” Baleh Udin Kuriak. “Iyo, tapi kini kajadiannyo sabana mambuek awak taibo.

Bayangkanlah surang mande anak, tapaso mancilok susu untuak anaknyo nan lah mamakiak-makiak dek awih,” kecek Malin. Baitulah Malin mancubo mancaritokan barita nan baru sajo dibaconyo. Memang, barita surek kaba hari kapatang di antaronyo ado nan bajudul: ‘Demi Anak, Seorang Ibu Mencuri Susu’. Barita tu sabana mambuek hati Malin taibo.

Nan diibokannyo indak masalah ekonomi sulik se doh, tapi juo lah samakin tipih bana raso-raso sosial di dalam masyarakaik. Mustinyo kadai-kadai nan ado di dakek tampek tingga amak paja tu namuahlah maagiah utang agak sakotak susu anak. “Iko tamparan untuak pamarentah mah. Lah bana dapek Piala Adipura, tapi kalau rakyaik nan sarupo iko dipabiakan sajo, ambo raso parcuma se.

Pamarentah musti maambiak langkah untuak manolong kaluarga nan sarupo ko. Kalau paralu jan sampai ditahan pulo inyo. Kok ado susu di swalayan nan diambiaknyo, sarancaknyo ditolong mambayiakannyo. Kalau paralu, urang punyo swalayan ko maiklaskannyo sajo. Iko masalah kamanusiaan,” kato Tan Baro. “Iyo tapacak aie mato ambo mambaconyo,” kecek Malin sakali lai.

“Jadi, salain pamarentah, urang-urang nan lai bapunyo musti mancaliak kuliliang tampek tingga. Kalau ado urang bansaik nan indak makan, samantaro awak bagalimang harato, mako urang kayo ko badoso,” kecek Uncu Labai pulo.

Tamanuang saluruh urang nan ado di lapau tu mandanga kato-kato Uncu. Memang, kalau dipikia-pikia, sabana banyak urang kayo atau urang barado nan indak paduli jo nasib kaum bansaik. Nan kayo tiok hari kalua masuak pakai oto rancak, kaco itam batutuik rapek. Samantaro urang bansaik dipabiakan sajo indak makan, anak-anaknyo indak manyusu bagai. “

Iyo mah, di tampek ambo ado pulo urang kayo, anjiangnyo tiok pagi minum susu, tambah talua saparo masak gai. Tapi indak jauah dari rumahnyo ado urang bansaik nan hanyo minum aie putiah sajo. Kadang makan, kadang indak. Anak-anaknyo mangowek-ngowek mintak makan, tapi nan urang kayo tu icak-icak indak ado kajadian se. Kok datang urang bansaik ko, pintu rumahnyo bakunci taruih. Paganyo ampia samo tinggi jo atok. Ado pulo anjiang herder di dakek garase,” kini giliran Kari Garejoh nan mangecek.

“Nan bantuak itu banyak mah. Kok awak kumpuakan, mungkin ado agak sapuluah lapangan bola,” kato Kudun pulo. “Jadi, awak ko hanyo rancak di labuah,” tambah Tan Baro.

Tibo-tibo ota baranti, karano di tv ado barita masalah Manohara. Lah tabulancik pulo mato saparo urang-urang di lapau tu ka siaran tu nampaknyo. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: