//
you're reading...
Palanta

Cik Kudo

“Yo nyalang incek mato wartawan ‘Singgalang’ ko nampak dek ambo. Nan indak nampak dek urang, jaleh dek inyo.” Baitu kato Kari Gerjoh.
Urang-urang nan ado di palanta lapau Uwo pagi tu takajuik. Saluruh mato mancaliak ka inyo. Karano, mulonyo indak ado nan basuaro. Kasadonyo laruik jo bacaan surang-surang. Surek kaba nan tabik 28 halaman abih tabagi-bagi. Satiok urang, mamacik sahalai koran.
“Kok rabun, ma bisa manjadi wartawan!” Salo Ajo Tondeh.
“Awak-awak ko lai baincek mato pulo, tapi nan indak tampak dek awak, dek wartawan ko jaleh,” kato Kari.
“Apo contohe?” Tanyo Ajo.

“Contohnyo iko ha,” jawek Kari sambia mampacaliak-an barita nan bajudul ‘Tahi Kuda Kotori Jalan’.
Tabudua incek mato Ajo mancaliak. Maklum, inyo agak rabun-rabun jauah saketek.
“Mandakeklah ka mari, nak jaleh. Mato lai gadang, tapi pambarek kaniang se,” sambuang Kari nan disambuik jo galak kawan-kawannyo.
Baitulah suasana di lapau Uwo Pulin satiok hari. Dalam sarius mangecek, ado-ado se galeme nan masuak. Itulah nan manjadikan pakawanan sarato silaturahim urang-urang di situ sabana dakek.
“Ooo…., iko. Kok cik kudo nan baseghak-seghak di jalan, lah sajak saisuak mah. Indak aneh gai tu doh,” kecek Ajo sasudah tau apo nan dibaritakan surek kaba urang awak ko.
“Yo indak jalan kincia-kinci Ajo nampak dek ambo doh. Nan ambo mukasuik tadi, dek wartawan nampak jaleh cik kudo baserak-serak, tapi dek lembaga nan maurus kabarasiahan atau nan maurus transportasi mungkin indak basuo,” baleh Kari agak padeh.
Kawan-kawan nan lain tagalak baliak. Ajo Tondeh tamanuang. Taraso batua juo apo nan dikatokan kawannyo tu, walau saketek manyakik-an talingo.

“Iyo lo yeh…. Kok tampak dek pajabaik sarato putugeh, tantu dicarikan solusinyo. Umpamoe, dipagadang karuang panampuang cik kudo tu supayo indak baseghak. Atau dibuek aturan, bendi indak buliah masuak ka jalan-jalan tatantu. Hebat Kari kini yo….!” kasudahannyo Ajo maakui jalan pikiran kawannyo tu.
“Ambo raso, iko juo bagian dari nan dikatokan Pak Gubernur katiko maambiak sumpah atau malantik walikota kapatang ko. Pak Gubernur katiko itu mangatokan lalulinteh di kota ko lah sabana indak manantu, paralu dipaelok-i. Kalau manuruik ambo, kecek Ajo tadi batua juo. Di kota ko indak ado jalur-jalur khusus. Jalan apo nan bisa ditampuah roda oto, mako saluruh jinih alat transportasi bisa lo bajalan di sinan. Caliaklah, bendi bisa bajalan di jalan-jalan protokol. Baitu juo angkutan umum. Indak ado pamisahan untuak jalur angkutan umum jo jalur lain. Indak ado pambateh jalan nan bisa dimasuak-i dek kandaraan indak bamasin, sahinggo lah basalingkik-pingkik se jadinyo. Mustinyo, ka muko lah paralu ado jalan-jalan nan indak buliah dimasuak-i dek bendi, becak barang atau kandaraan umum. Jo caro itu, ambo raso, lalulinteh di kota awak ko agak bataratik saketek daripado bantuak kini. Baa manuruik pandapek kawan-kawan?” Tibo-tibo Tan Baro sato mangecek panjang leba.

Ditanyo saroman itu, nan lain hanyo nampak maangguak-angguak sarupo balam nio kawin. Antah iyo lai sabana mangarati jo apo nan dikatokan Tan Baro tadi antah indak, indak jaleh pulo doh. Nan pasti urang-urang tu hanyo maangguak.
“Apo nan Pak Osu angguak-an?” Tanyo Kari.
“iyo itu….., nan dikecek-an Tan Baro tadi. Ambo satuju!” Hanyo itu jawek Pao Osu.
Sarupo itulah demokrasi di lapau Uwo Pulin, masih ado juo nan asbun. Espe St.Soeleman

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: