//
you're reading...
Palanta

Angan-angan Tan Baro

Hari Akaik kapatang, lapau Uwo Pulin indak sarami hari Akaik nan lapeh. Mungkin sajo, di antaro urang-urang nan biaso ka lapau, hari tu pai baralek. Mungkin juo pai batandiang mamapeh atau pai batandiang layang-layang.

Walau langang, namun nan lakon-lakonnyo lai masih setia duduak di palanta lapau tu sambia maota apo sajo, mulai dari masalah politik, Manohara, Prita, masalah Ambalat sampai masalah mahanyo sikola. Kabatulan pulo, laporan surek kaba ‘Singgalang’ Minggu juo masalah pitih untuak kuliah nan indak saketek.

Barangkali diilhami dek barita mahanyo uang kuliah, mako Tan Baro mancubo marajuik angan-angan. Saandainyo, lai banyak pitih, taniaik pulo deknyo untuak mambuek yayasan. Di dalam yayasan tu ado sikola SMA jo paguruan tinggi. Karano memang lai bapitih banyak, mako anak-anak nan basikola di situ dikhususkan dari kaluarga nan kurang baruntuang. Di situ, sagalo-galonyo indak mambayia. Perai sabana sangaik. Indak perai caro pamarentah kini doh!

“Saandainyo ambo punyo pitih banyak sarupo calon presiden jo calon wakie presiden tu, mako ambo buek yayasan untuak pandidikan. Di situ ado SMA jo paguruan tinggi. Ambo agiah namonyo Yayasan Murah Meriah. Di universitasnyo ambo bukak Fakultas Ekonomi Lemah, Fakultas Teknik Cari Duit Halal, Fakultas Peternakan Uang dan nan paliang unik tu ado namonyo Fakultas Padukunan Baranak,” baitu kato Tan Baro nan didanga dek konco-konconyo.

“Din, cubo resek saketek kaniang Tan Baro tu. Angek ndak?” Angah Piyan basorak ka Udin Kuriak. Mukasuik Angah, apo kawannyo tu lai dalam kondisi stabil atau sadang tasapo jin lawik gai. Soalnyo, Tan Baro baru sajo pulang dari Pantai Padang.

“Ambo masih sadar saratuih porosen, Ngah!” Lansuang se Tan Baro manjawek karagu-raguan konco palangkinnyo tu.
“Kok iyo lai sadar, manga tibo-tibo se Tan Baro bantuak urang damam paneh?” Tanyo Angah.
“Bacito-cito jo baangan-angan se indak pulo buliah dek Angah? Lah samakin sampik se makna reformasi nampaknyo dek ambo mah,” baleh Tan Baro.

“Tapi, cito-cito saroman itu, indak ka mungkin tu doh,” kato Angah.
“Ambo mancaliak salaruik salamo ko. Urang kayo babondong-bondong mambuek yayasan paguruan tinggi. Malah, kini lah tiok kabupaten ado paguruan tinggi. Cuma sajo, nan bisa kuliah di situ hanyo urang-urang banyak pitih se.

Kasudahannyo, nagari ko hanyo diparuntuakkan ka urang bapitih sajo. Anak-anak dari kaluarga bansaik saolah-olah hanyo mangontrak. Bacolah laporan ‘Singgalang’ hari ko. Di situ dikatokan bahaso maso depan nagari ko ado di dompet taba. Jadi, ambo punyo cito-cito atau mungkin juo hanyo sabateh angan-angan untuak mambuek yayasan sarupo itu, supayo anak-anak nan dari kaluarga bansaik bisa pulo aman dalam manggapai cito-citonyo. Mano tau beko, nan ka jadi presiden isuak datangnyo dari anak-anak kaluarga bansaik tu,” jawek Tan Baro manjalehan.

“Umpamonyo, Tan Baro iyo lai dapek rasaki nan tibo-tibo se. Bamiliar-miliar pitih Tan Baro, apo bisa mambuek universitas bantuak itu? Dari ma operasionalnyo? Sabab, kalau indak ado pitih masuak, tantu sabanta yayasannyo mati,” giliran Uncu Labai nan batanyo.

“Caronyo, sakalian pitih nan ado tadi didepositokan. Kan tiok bulan ado bungonyo. Nah, jo bungo deposito tu lah saluruhnyo dijalankan, tamasuak gaji Uncu sabagai dosen kasenian rabab,” jawek Tan Baro.
“Kalau saluruhnyo dari bungo deposito, jo apo kaluarga Tan Baro makan?” Tanyo Udin Kuriak.

“Dari karajo ambo. Kan ambo tatap juo karajo sarupo iko! Pagi duduak di lapau. Siang pai karajo proyek. Patang-patang sampai malam duduak lo liak di lapau ko,” jawek Tan Baro sambia galak. (Espe St.Soeleman)

Sumber : Singgalang

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Archives

%d bloggers like this: